ساعة أرقام

ساعة أرقام
والارقام من زيرو لتسعة
والاعداد بتزيد وبتسعى
تولد لينا ايام وسنين
ساعة محبة
وساعة حنين
ثانية عشق
تكفي سنين
وبينى وبينك
ساعة حب وساعة فقر
ساعة عشق وساعة قهر
وسنين رابضه بخانة الصفر
وغيرنا اصطاد سنين العمر
جيوبنا خاوية ع البناطيل
الدخل قليل
والمطلوب محتاج تفصيل
والجسم عليل
ولا الف جراحة تسد الخانة
انا بدنى نحيل
والناس مش بتصدق
انى فقير
ما لسانى طويل
مايسكتنيش غير جرس الساعة
بتقول مواويل
: يا عينى يا ليل
يا ابو الليالي يا ليل
عيل ولف البلاد
من شرقها لغربها
لطعته علي قفاه
قال بعلو صوته ربنا يسهل لها
ضحكو عليه الضعاف
مايعرفوش انه اقوى منها
لكن عبيط اللي يعادى الحياة
لو يوم يقف في وشها
تفرمه تحتها