اصل الحكاية

عايزة تعرفي اصل الحكاية
 طب ازاي
والحكاية مالهاش نهاية
 الحكاية اصلا مالهاش بداية
هى اصلا متلغبطة
متشقلطة زى كحك العيد
اي عيد مافيهوش جديد
لاننا عمرنا
ماكان لينا عيد
اتولدنا اتقابلنا
عشقنا همنا
وافترقنا
واتلاقينا وافترقنا
انا وانت متكررين
لنا لويس ولا انت بمبادورة
احنا مش معروفين
لا لينا فن ولا لينا كورة
احنا يا روحى ممسوخين
منسوخين من الف لوحة متقلدين
بس ممكن تكون لينا مواقف كتيرة
وتجارب مريرة
ودموع سايلة ع الخدين
حكاوينا علي اد الايد
زى احلامنا تتعد علي صوابع الايد
كان حلمى ابقي زجال
واقول اشعار
وامدح فيك انت بالذات
مش بكتب شعري لاي بنات
ماحلمتش يتغنى بشعري
دياب ولا تنقال ادام سادات
كان همى
 الاقي فيكى حضن امى
وتجيبيلي البت
ولو جه واد يبقي سندى ع الدنيا
بس انا عايز بت
هخليها ست
وست الستات
هسقيها علم فولتير
وحكاوى مونتير
واحفظها كتاب الله
وتقلد عباسط والمشاوى وبشير
كان نفسي
اتجمع انا وانت في بيت
ويبقي عندنا غيط
ونسهر ليلة الجمعة
نقرا الكهف والدخان
كان نفسي في احلام
 تتعد علي صوابع ايدى
لكن قدري ونصيبي
انى اشوف موتى
وماتبقيش نصيبي
طب اصارحك
لسايا بحبك
لسايا بدوب لما اسمع اسمك
ووشي بيحمر
وسنانى بتبان
ببقي فرحان
طب فاكرة لما قابلتك صدفة
وبعد غياب
حسيت انى هربان م الكُتاب
ورايح اقابل جارتى في السرداب
كان نفسي عقارب الساعة تموت
والوقت يمسمر مايفوت
وانا عارف انك مشغولة
وعدتى بكلمة ومسئوله
والكلمة في حنكى مشلولة
خايف اقولها
لتهرب منى زملتى
ومتقابلنيش
عامل فيها سبور
وانا اصلا اللي خلفنى شاويش
عارف انك محتارة
متغالطيش
محتارة مابين الحق وبين الزور
وانا متكتف مانا عامل فيها سبور
بس مابينى وبين نفسي
عمري ماكنت فرفور
وعشان انت مش حسانى
فالاسلم انى احبك
وقلبك يسلانى
وأصل الحكاية ماتسأليش