المنظر الثانى
نفس ديكور المنظر الاول بالكراسي (بطرس – خالد – هانى- سمير)
يجلس بطرس امام الكشك والباقي يجلسون حوله
بطرس: الواد اسحق اتأخر عليا النهارده
هانى: الساعة لسه 6 يا عم بطرس
خالد: هو بيخلص وردية الساعة كام
بطرس: لا هو النهاردة اجازة
سمير: الغايب حجته معاه
بطرس: اليومين دول يومين قلق والتخبيط في الفاضي والمليان دول قتلوا اللوا
نبيل فراج
خالد: كل ده هيتلم بس ربنا يكرم واللجنه تخلص كتابة الدستور
هانى: هما بيقعدوا قد ايه (يدخل وردانى حاملا قفص العيش)
وردانى: احلي مسا سخن ع الناس الصابحة
خالد: ازيك يا عقاد
وردانى: الله يخليك يا زغلول
سمير: ما فيش اخبار يا رويتر
وردانى : اشتم اشتم ما انت اتعلمت كده في الكلية
هانى: وهي رويتر دي شتيمة
وردانى : هي مش رويتر دي وكالة والاعلام بقت شغلانة اللى مالوش شغلانة دا
خالد بقي مذيع يا جدعان
سمير: يخرب عقلك مانت عارف اهو
وردانى: بس انا مش رغاي زى النسوان ولا بتكلم وخلاص وبعدين والمصحف انا ما
بتكلمش الا مع المثقفين
بطرس: طب يا مسأف ايه الاخبار
وردانى: تكرار مافيش جديد
سمير: ازاي بقي انت ماتعرفش انه مابيعدش نفسه
وردانى: بيعيد نفسه بس الاسماء هى اللي بتختلف
خالد: (ضاحكا) اثبت لهم صلهم فاكرينك رغااااااي
وردانى: ايه هي انجازات عبد الناصر
هانى: بنى السد وامم القناة
سمير: وعمل الاصلاح الزراعي
خالد: وانشا المصانع الحربية
وردانى: طب مامحمد علي بنى خزان اسوان وعمل ترسانة اسلحة ووزع الفدادين ع
الفلاحين ملكية صغيرة وملكية كبيرة بلاش كده اقولكم علي حاجه غريبة محمد علي نفي
عمر مكرم وحدد اقامته في دمياط
سمير: هو الزعيم عبدالناصر حدد اقامة حد
وردانى: نفي الزعيم خالد محي الدين لروسيا التاريخ بيعيد نفسه بس بيغير
االمكان والشخصيات عارفين ايه اللي هيحصل في لجنة الدستور
خالد: نبأنا يا هدهد
وردانى: فاكرين اللي حصل في الدستور بتاع السنة اللي فاتت لما اتسحب ناس
ودخل ناس وفي النهاية خرجولنا بدشيش وقالوا عليه دستور
هانى: ماالناس كلها عارفة اللي حصل
وردانى: هو نفسه اللي هيحصل بس بدل المعارضة ماكانت رافضة الدستور هتلاقي الجماعات الاسلامية
هى اللي رافضاه وهيجري في الارض اللي نفسي اعرفه يا زغلول ليه مايطبقوش قانون
المنتخبات كخة يعنى
خالد: منتخبات محمد علي مش كخة بس الناس عايزة دستور يفصلوه باديهم
وردانى: الناس عايزه زغلول يلمهم حواليه وناصر يحب البلد عايزين حكيم يعشق
ارض البلد دي
سمير: حزب الوفد كان حاطط دستور في 94 وطلب تنفيذه لكن مبارك رفض
هانى: ماتقولنا يامتر ايه شروط الدستور
سمير: باختصار هو كونتراتوا بين المواطن والحكومة
وردانى: الدستور يا دكتور بيحدد حدود الدولة ولغتها وشروط كل منصب سياسي من
الريس للغفير وحقوق وواجبات المواطنين يعنى لو محامى كفاءة او مثقف زى حلاتى يخلصة
في اسبوع لواحده
بطرس: طب ما روحتش كتبته لهم ليه
وردانى: لجنة الخمسين كل واحد هيلهف له خمسين والاستفتا يعنى مستشارين
وعلاوة وبدلات وانتقالات
سمير: ياجاعة دي اصول قانونية
وردانى: دي زيادة مديونية واللي هيستفيد هما المذيعين كا واحد هيشتغله خمس
ست حلقات ع الدستور هيمسكلة كام مادة فيهم شبهة دستورية (يغير لكنته) السيدات
والسادة احنا النهاردة امام مهزلة دستورية المادة مش عارف ايه م الدستور بتشترط ان
الترشيح للرئاسة يستلزم 30 الف و500 توكيل دى متقفلة علي فلان وفلان ايه رايك يا
استاذ فلان(بصوت اجش) من البداية وانا بحزر من هذه المهزلة وادى النتيجة للاسف
اللي اترشحوا من سنتين مجمعين 30 الف صوت يجيبوا منين الخمسمية انا انا بندد باللي
بيحصل ده وابطالب الحكومة بعودة دستور 23
خالد: (يضحك) دا انت مسخرة
هانى: والله البلد اللي بقت مسخرة (تمر نادية معها باكيت شاي وسكر علي يد
بطرس تقبلها)
نادية: ازيك يا بابا
بطرس: امال فين اسحق
نادية: اسحق مستريح شوية وعت دول وبيقلك هتروح
بطرس: استنى تشربوا شاي يا اساتذة
وردانى: ياريت يا عمنا
هانى: لوهتعمل اعمل لنا معاك معلش يا عم بطرس
بطرس: عينية اعملي 5 يا نادية وصبي للواد وردانى في الكوز الصفيح
وردانى: علي قلبي زي العسل يا عم بطرس
بطرس: انا بهزر صبي له في احسن كوباية عندك
سمير: اعمل حسابي
بطرس: عامل حسابك يا سيدي
خالد: بمناسبة الي حاصل واللي بيحصل انا كنت عايز اعرف رايكم في حاجة
بطرس: قول يا زغلول
خالد: عايزين مين يبقي الريس
سمير : (يضرب وردانى علي كتفه) ماتنطق يا كلامنجى عايز مين
وردانى: بلاش انا علشان كلامى مش هيعجبكوا
هانى: ليه تكونشي هتتنازل عن ووزارة الدقيق وهتبقي الريس (قهقة الجميع )
وردانى: لعبة الدول علمتنى انى لازم ابقي موجود لكن مابقاش الالفي يا دكتور
سمير: انت صدقت نفسك
خالد: خللو وردانى الاخر انت عايز مين يا عم بطرس
بطرس: انا بحترم شفيق ملو هدومه
خالد: انت حر رايك ويحترم
هانى: حمدين لو اترشح هديله صوتي
سمير: وانا هدي صوتى لسامح عاشور
خالد: وانت يا وردانى
وردانى: انت هتديه لمين
(تدخل نادية ومعها الشاي)
نادية: انا هدي صوتى لسيسي
خالد: وانا هديه للسيسي
وردانى: طبعا انتوا عايزين تعرفوا رايي
سمير: ولا يهمنا في حاجة اشرب الشاي اشرب
وردانى: انتوا الخسرانين
خالد: قول لنا عايز مين
وردانى: مش انا اللي عايز لكن مين اللي هاييجي
هانى: انت واثق بقي من واحد
وردانى: يا اساتذه نرجع بالتاريخ لورا حبتين هنلاقي بعد المسيح مسك الرسول
متى ومتى كان بيجمع الضرايب يعنى بعد براءة المسيح كان لازم يمسك واحد شديد وبعد ابو
بكر مسك سيدنا عمر بشدته وقوته وجبروته ما كانش حد يقدر يكح معاه
سمير: خلص عايز تقول ايه انت هتحكيلنا التاريخ كله
وردانى: بلاش نرجع ورا بعد محمد نجيب وطيبته مين اللي مسك مش الزعيم عبد
الناصر والناس كانت بتخاف منه وبتحبه
هانى: يعنى اللي هترشحه المؤسسة العسكرية هو اللي هيفوز
وردانى: المؤسسة العسكرية هتقدم اتنين
خالد: قصدك سامى عنان والسيسي
وردانى: ممكن يكون السيسي والفريق مهاب ولو حد كسب يبقي مهاب مش السيسي
خالد : هو مهاب هيترشح
وردانى: هما هينقوا فرعون يكهرب الدنيا لكن عنان محبوب والناس بدأت تحب
السيسي
سمير : انت محسسنا انك فاهم كل حاجه
هانى: والله يا متر كلامه منطقي
وردانى: دا مش كلامى دا كلام لعبة الامم وبكرة تصدقونى لما الجيش يرشح
اتنين احتمال يكون السيسي منهم لكن الاكيد يا يترشح مهاب او عبدالعزيز سيف وانا
واثق م الكلام ده لان الجيش ما بيلعبش
(يدخل ع المسرح ضابط ومعه اتنين عساكر)
الضابط: انتم قاعدين كده ليه
بطرس : احنا قاعدين قدام الكشك بتاعي وده الدكتور هانى وده محامى وده استاذ
الضابط: ومعاكم بنت كمان دا انتوا قالبينها كرخانة (يشدها) خدي يا بنت اسمك
ايه
بطرس: دي بنتى يا سعادة البيه والعذرا دي بنتى (يقوم الجميع) دي نادية بنت
عم بطرس
الضابط: هو انت مسيحي
بطرس: ايوه يا بيه
الضابط: اقفل الكشك الساعة سبعة ونص
سمير: حظر التجول الساعة 11
الضابط: النهاردة الجمعة يعنى الحظر من الساعة 7
وردانى: وده ماله ومال حظر التجوال هو احنا بنلف في الشوارع احنا قاعدين
قدام بيوتنا
الضابط : مش عايز كتر كلام خدوهم وسيبوا الراجل المسيحي وبنته
بطرس: انا هرفت ليه الاخوان بيحرقوا الكنايس انتم اللي كرهتوهم فينا انت
عندك حق يا وردانى انا جاي معاكم وردانى
عنده حق بتاع العيش كان عنده حق
(يخرج الجميع)
(ستار)
ليست هناك تعليقات:
إرسال تعليق