مسرحية قهوة المصريين

قهوة المصريين
الجزء 2

سمير: قانونا انت الغلطان وصاحب البيت بيدافع عن نفسه

وردانى: اسم الله عليك يا متر هما بقي اعتبرونا بنتعدي عليهم في دارهم

اسحاق: دار مين مصر بتاعة المصريين كلهم

هانى : (ينظر لوردانى ) الشمس ماثرة عليك صح

وردانى: انتوا اللي كتب الوزارة ماثرة عليكم هو انت لما بتقف في الشارع وحد يسالك انت واقف هنا ليه بترد عليه وتقول له ايه

هانى: واقف في ملك الحكومة طبعا

وردانى: الله عليك يا دكتور الكتاب ماثر عليك ماثر عليك فعلا الشارع والميدان ملك الحكومة واحنا اللي روحنا لهم برجلينا

خالد: ما علينا طب ده اول غلط لان التجمهر كان في ميدان ملك الحكومة طب والغلط التانى

وردانى: لو فيه واحد واكل عليك قرشين وضربلك عيل مش بتلم العيلة وتروح له

خالد: (بغضب) وهضربه هو وعسلته نفر نفر

وردانى: ولو اتدخل ابن الحلال علشان يصلح ما بينكم وهيجيب له كبير علشان قاعدة الصلح صح

سمير وهانى : صح

بطرس: يابنى اللي مالهوش كبير بيشتري له كبير

وردانى : هو ميــــن؟

سمير : مين ايه؟

وردانى: مش انتم خدتم بعضكم وزورتوا الميدان اللي جاب لمراته علم واللي جابلها دبله صينى واللي جاب لها مج ورسم عليه صورتها

خالد: انا رحت مش علشان الكلام الهايف ده لان ده شرف ليا انى احضر ثورة مش هتتكرر تانى

وردانى : (بسخريه) ااتكررت واتكررت

سمير: وانا خدت الاولاد ورحت

وردانى: واكيد جبتلهم درة مشوى وترمس

سمير: انا ما انكرش انى جبت الحاجات دي للاطفال بس انا جبت علم مصر

هانى: انا نزلت لكن ما قعدتش كتير

بطرس: وانا واسحاق نزلنا ما المصنع كان واخد اجازة

وردانى: وقابلتوا زعيم الثورة؟

الجميع: هي الثورة كان لها زعيم

وردانى: مش عيب لما تكون عيلتين هايتخانقوا كل واحد يجهزله كبير ولما نثور ع الظلم نستكبر ناخد لنا كبير

 بطرس: بقي هى دى ادلة البراءة

سمير : مش كده بالظبط بس اعتبرها كده

هانى: بردوا مافهمناش هما طلعوا براءة ليه يامتر

خالد: وهو ايش عرفه يا دكتور هو كان المحامى الاول ده حاي الله

سمير : لعلمكم انا افهم في القانون اكتر من اي حد لكن ما عنديش جرأة اقف ادام القاضي

اسحاق: بلاش تترافع يا رياسة قولنا علي اسباب البراءة ولا يكونش كلام وردانى مظبوط

(يدخل زيزو مرتديا ملابس كاجوال ويغنى )

زيزو(يتلفت حوله) انت قلبتوها قهوة

اسحاق : تشرب شاي يا زيزو

زيزو :وشيشة قص

بطرس : مشاريب بس وتجيب كوبايتك معاك

زيزو :ليه كده يا عم الشباب د احنا بيجمعنا الحب مش السيجارتين

بطرس: وتجيب الكرسي بتاعك كمان

زيزو : اهو كده يا افنديا قلبتوها قهوة مماليكى زى فيلم المماليك

وردانى : فيلم المماليك

زيزو: انت ما شفتهوش ده حته فيلم كنت هشتغل فيه مع الاستاذ اسامة وقعد يقوللي انت انروورد السيما وحفظت الدور صم لكن شيخ التجار اللي هو مين الكبير بتاع البياعين كان بيلم البياعين حواليه وكل واحد يجيب الكرسي بتاعه معاه وقدح القهوة ويرتشفون الشاي

       وبعدين تاجر المينى فاتورة عرض انه يعمل مقهى نتلم فيها بربطة شيخ بندر التجار وسموها  قهوة المحروسة قهوة المصريين التجار لكن المنتج باع الكاميرات علشان يشتري فرختين وازازة كونياك وقضي ليلة عداله مع البطلة وانا جبتلهم حته بنى عداله كات ليلة ياه لو كنت مثلت الفيلم ده قهوة المماليك المصريين

بطرس : ماشي هى دى قهوة المماليك المصريين

          كمل يا متر ازاى الظباط طلعوا براءة

سمير :تقارير الطب الشرعى بتقول ان الضرب كان من تحت لفوق ومن فوق سطوح البيوت يعى المجرم اللي قتل المتظاهرين كان منهم فيهم

هانى : ووزير الداخلية ومبارك ونوايب الوير

سمير : هولما المتظاهرين نزلوا الميدان وقعدوا 18 يوم مارك بعت لهم مصفحات تضربهم

الجميع : لأه

زيزو: بعت لهم دبابات تحرصهم انا كنت معالاستاذ عمرو عبد الجليل والاستاذة منة شلبي في فيلم المعركة

وردانى: اسكت يا زيزو انت السيما لحست عقلك والله الراجل ده مافاهم حاجه

سمير: هما دول السبب في براءة مبارك علشان مش فاهمين حاجه

بطرس: وهو القاضى مش فاهم حاجه يعنى

سمير: القاضى ليه اوراق وشهود قدامه

بطرس : حلاوة . هما كانوا جايبين  قاضى من فرلندا وللا ايه

سمير: ياعم بطرس يعنى لو كان اتعدم كان الوضع هيتغير كتير

وردانى: اكيد كهرب المربوط يخاف السايب

خالد: الثورة البلشيفية اعدمت الملك والحاشية علشان كده ثورتهم نجحت والثورة الفرنسية لكن ثورتنا العربية فستك

هانى: طب بمناسبة الفستك والاوف سايد ليه حكموا علي قتلة الالتراس بالاعدام مالظباط برءوهم

سمير: (بعصبية) انت هتجيب الالتراس بيدفع فى كل ماتش شئ وشويات لحتة متظاهر كان عايز عدالة اجتماعية ايش جاب لجاب

زيزو : هو مش كله دم

هانى: لا. هو الدم واحد

وردانى: الدم واحد

سمير: دم البهايم اغلي وللا دم البنى آدمين

زيزو: البنى آدم اغلي دا الاستاذ محمد سعد بياخد في الفيلم 12 مليون شوف انت بقي يفصل كام جاموسة

هانى: ايه جاب دم ده للدم ده

سمير: طب انت عارف تمن كلب احمد عز عامل كام

وردانى: 200    300 جنية 400 جنية يعنى

سمير: دا من سلاله نادره وتمنه 650 الف جنية يعنى لو عورته تدفع 650 الف جنية وتعويض علي حزن عز عليه

وردانى: علي اساس انه من قرايبه  طب والله لو كان حد قريبي مات في الثورة انا كنت قتلت كلبه

سمير: بلاش عنجره ع الفاضي  ما انت اتعورت في الثورة عملت ايه

وردانى: اتعور اموت مش مهم انا

           انا فدا مصر فدا الناس لكن اهلي لأ

بطرس: انت هتعمل فيها وطنى يا واد يا وردانى

وردانى: (يقف بحماس ويلوح لبطرس بنبرة حزن ) واشرب شاي كمان

اسحق: (مقهقها) تشربوا شاي يا اساتذه (يجمع الكوبايات)

بطرس: بما انك يا دكتور هانى لمؤاخذه نفسانى هم الاخوان المسلمين لامؤاخذه لامؤاخذه مرضي يعنى

سمير: لامؤاخذه ليه يا عم بطرس لا حياء في العلم

هانى: دول مجموعة جهلة ودلاديل وماشيين ورا الكبير بتاعهم

زيزو: ولا بيفهموا اي حاجه وربنا مديهم اوي

خالد: لو راجعنا تاريخهم هنلاقيهم دمويين ما وراهمش الا القتل من ايام حسن البنا والهضيبي وسيد قطب

بطرس: طب وليه الازهر ما يعملهمش جلسات ايمانية ويطلع الشيطان من قلبهم

هانى: ما احنا اتفقنا انهم جهلة ومن صغرهم وهما ماشيين بمبدأ الطاعة للامير والكبير بتاعهم

سمير: خليفتهم يا عم

وردانى: تسمحولي بالطلعة دى

سمير: ما انت قاعد معانا هتروح فين

وردانى: لا انا قصدي ارد علي عم بطرس

سمير: (بغل) قوم يالا من هنا انت اللي هتعرفنا يعنى ايه اخوان دول جماعة مالهومش مٍله

وردانى: استغفر الله العظيم يا اسيادنا دول مصريين

سمير: مصري وبيخرب؟

وردانى: ايه رأيكم في عمرو موسي واحمد شفيق

سمير: موسي كفاءة من يومه بصراحه كفايه انه رجع لنا طابا بقضية

هانى: وشفيق عمل لنا مطار

وردانى: يعنى انتوا من اتباع الحزب الوطنى

سمير: انا اشتراكي

هانى: وانا وفدى

وردانى: وانت يا استاذ زغلول

خالد: انا من مؤسسي الوفاق القومى

وردانى: يعنى لو سيادة المستشار البسطويسي هو اللي كان كسب مش كنتم هتخدموا عليه

خالد وهانى: انا مش ممكن اخالف مبادئي

وردانى: بلاش كده فاكرين قبل موقعة الجمل لما مبارك خطب خطبة الوداع وكان هيعيط المذيعيات والناس عملت ايه؟

خالد: قالبوا سيبوه الست شهور

وردانى: ولما الناس اتسمرت في الميدان واتنحى كانت النتيجه ايه

خالد: انكشح الفساد السياسي

هانى: واتعملت انتخابات

بطرس: (مقاطعا) اتعمل انتخابات لكن الفساد لسه موجود

وردانى: هو ده يا عم بطرس الناس لسه ما اتشالش من دماغها تعليم 30 سنة

خالد: ايه علاقة ده بموضوع رابعة

وردانى: الشيعة وبتوع انجر فته حى بيحلموا انهم يرجعوا الدولة الفاطمية

سمير: انت بتخترف وللا ايه يا وردانى

خالد: تاريخيا صح  انا كده فهمت الله يفتح عليك

وردانى : واكيد الناصريين عايزين يطبقوا الاشتراكية

بطرس: والاخوان من حقهم يحلموا بالخلافة

وردانى: المهم يا افندية مش مين اللي عايزها وعايزها ليه

سمير: علشان نشر افكارهم

هانى: يعنى هنرجع مية خطوة لورا

خالد: واد يا وردانى تكونشي كونت مسهر امبارح علي فيلم الزينى بركات

وردانى: يا زغلول دا كان مسلسل وبعدين انا قريت الرواية علي فكرة انا بيعجبنى اسلوب الغيطانى بس محفوظ احسن منه بمراحل

سمير: يعنى انت عايش في خيال محفوظ وجاي تتفلسف علينا

(يقدم لهم اسحق المشاريب)

بطرس: ادي الشاي بتاعى لوردانى

اسحق: كده اتنين ب اتنين جنيه

وردانى: انا مش هحاسب الا اللي هشربه في الكوز

اسحق: بسيطه (يفرغ الكوب في الكوز)

وردانى: كده اتنين

خالد: الغريبة انهم فضلوا في رابعة لحد ما انضربوا وبردوا بيخرجوا كل جمعة

اسحق: بس حرقوا كنايس كتير اوي

هانى: كنايس وجوامع وبيوت

سمير: وكل يوم قضايا اغتصاب والمجرم ملتحى

زيزو: مع النسوان السنية حلوة اوي

اسحق: وانت ايش عرفك يا عم زيزو دول منقبات

زيزو: اصل انا ليا جار سُنى كنت بتفرج علي مراته وهى قاعدة في البيت بقميص النوم

بطرس: مرات جارك استغفر ربك يا ابنى

زيزو: مش هما بيقولوا علينا كفره يبقي اعمل اللي انا عايزة

وردانى: يعنى جارك ده خرج عليك مرة وقاللك في وشك انك كافر

زيزو: لأ بس المذيع قال كده وبعدين انا اشتغلت مع الاستاذ عادل امام في فيلم الارهابي (يمصمص شفايفه) اما عليه حركات ممثل ممثل

وردانى: بزمتكوا مش زيزو زمبوا في رقبة مبارك

زيزو: ايه ده يعنى انا كنت ممكن ابقي ممثل واساعد الاستاذ عادل امام زى الاستاذ سعيد صالح

وردانى: لو الاخوان كانوا فضلوا كان هيخلوك انت واللي زيك الممثلين

زيزو: يعنى السنية ماكانوش بيكفرونا وكانوا عايزيننى ممثل بجد(يعض علي اصابعه) طب ليه السيسي شالهم

(يضحك الجميع)

خالد: بيهزروا معاك يا زيزو

زيزو: انتوا هتلغبطونا ليه هما كويسين وللا لأ

هانى: ما قولنا لأ

سمير: هو انت مابتتفرجش علي التليفزيون

وردانى: طب والمصحف الشريف  وحياة الكعبة انتوا عاملين زي المذيعين بغبغانات ع الفاضي

سمير: وانت يا بتاع العيش اللي بتفهم

وردانى: انا بشترى مية رغيف من الفرن البلدى بخمسة جنية ومية من الفرن الافرنجى بعشرين جنية واكيسهم وابيعهم بخمسين جنيه بعمللي الحركة دي في اليوم 3 اربع مرات يعنى لا موزعين عليا صيغة محضر ولا صيغة دعوى واخد بالك يا متر ولا مكتفنى بمنهج وزارة يا استاذ زغلول ويوم ما اتكلم علي الوطنية اتشد ع النيابة ولا مديينى يا دكتور قايمة بالامراض وعلاجها

بطرس: انت عايز تقول ايه يا ابنى

اسحق: اكيد وردانى بيضرب برشام

وردانى: انا ما بشربش اكتر من السيجارة ومكسبي بقسمة اربعة ربع لامى واخواتى وربع سجايرى ومصاريفي وربع لتانى يوم اشترى بيه عيش

سمير: كده ناقص ربع

هانى: ماهو ده اللي بيشتري بيه برشام

وردانى: لأه انا بشتري بيه كتب

خالد: ماتقولش يا وردانى طب اخر حاجه اشترتها كانت ايه

وردانى: نادى السيارات بتاع الاسوانى ولو انها ما عجبتنيش ونسخة جديدة من اعترافات اعتماد خورشيد

خالد: دا انت مثقف ومستخبي في الرغيف بصراحة احنا كنا فاكرينك بتفشر لما قولت انك بتقرا لمحفوظ

وردانى: تعرفوا ان محفوظ كان عبقري

هانى: كفاية انه واخد نوبل

وردانى: بغض النظر عن نوبل انتوا عارفين رواية ولاد حارتنا الكل عمل عليها ضجه دى رواية مهمة جدا

سمير: ما لقيتش الا الرواية اللي فيها كفر والحاد

هانى: كانوا عايزين يخلصوا عليه الله يرحمه

زيزو: لما ضربوه السكينة في رقبته بس طلع ناصح فضل لازق رقبته في الكرسي

وردانى: محفوظ لما كتب ولاد حارتنا كان متأثر بكتاب اسمه هكذا يقول زرادشت

بطرس: يعنى محفوظ كان بينقل من الكتب التانية

خالد: لا يا عم بطرس بتعجبه الفكرة والنظرية فيعمل عليها روايه

وردانى: اهو كان متأثر بقي بكلام زرادشت وهو نازل من الجبل لما لقي واحد بيصلي وقال له ان ربنا مات ورا الجبل

سمير: ايه علاقة ده بولاد حارتنا انت قريتها اصلا يالا

هانى: دي حاجة  والرواية حاجة تانية خالص ايه رايك يا زغلول

خالد: طب نسمعه د طلع مثقف جايز يكون العقاد ومش واخدين بالنا

وردانى: الموضوع ده اثر في محفوظ واتنبا ان في يوم من الايام الاهالي مش هتقول لولادها غير حاجه واحدة بس

خالد: ايه الحاجه دي

وردانى: كل اب وام هيقولوا لابنهم قوم ذاكر عايزينك تبقي دكتور تبقي مهندس شوف فلان ابن فلان جاب كام في المية هيخش طب وعلشان كده محفوظ خلي عرفة اللي هو العلم قتل الجبلاوى اللي هو الايمان

سمير: يابن الايه يعنى الجبلاوى مش هو الله

هانى: تصدق معقوله بردوا

وردانى: هو ايه المشترك بين سيدنا موسي وعيسي وسيدنا محمد مش الايمان (يصلب اسحق وبطرس علي صدورهم)

خالد: بس كده يبقي ماحدش فينا كان فاهم الرواية

وردانى : سيد قطب اللي اعاد التنظين في الستينات كان فاهم كويس الكلام ده

خالد: معقوله

وردانى: هو اللي كان بيكتب النقد لروايات محفوظ ماهو كان ناقد قبل ما يسافر امريكا

خالد : مانا عارف انه كان بتاع لغة عربية

هانى: عشان كده هما استغلوا النقطة دى وقالوا عى المثقفين علمانيين

وردانى: والنظام بتاع مبارك كان بيدخل العيل في الطاحونة يقعد من سن 6 سنين لحد مايخلص الجامعة قايم نايم بالكتاب ويخلص الكلية يخش الجيش ويخرج يشتغل اي حاجة علشان يجيب له تيشيرت وبنطلون

خالد: بردوا انت ما قلتش يا وردانى ليه بتوع رابعة متمسكين برجوع مرسي

وردانى: لانهم من صغرهم شايفين انهم بجاهدوا بصلاتهم وبصومهم والتزامهم ومستنيين الخلافة مكافأة من ربنا

سمير: طب ماهم نجحوا في الانتخابات ماحافظوش عليها ليه

وردانى: لانهم اساتذه في ادارة المشاريع مالهومش في ادارة البلاد

خالد: (مقاطعا) الرئاسة جات لهم من غير استعداد

زيزو: بس بالامانة هم كانوا هيخلونى بطل وممثل

هانى: صحيح الحق روح اقف معاهم في الجيزة

(يهم بالوقوف)

زيزو: الحق انا

اسحق: هات تمن الشاي  قبل ما تمشي

هانى: انا هدفعه بس الحق انت لعادل ادهم ياخد الدور بتاعك

زيزو: الاستاذ عادل ادهم مات انت بستهزأ بيا

هانى: يابنى انا بتكلم علي ابنه عادل عادل ادهم

زيزو: طب شكرا يا دكتور ع الشاي انا هروح اقف معاهم (ينظر لوردانى) بجد يا وردانى انت طلعت رجولة وانا لزما اول بطولة ليا احكى قصتك(يتظاهر انه ماسك شئ في يده) وهجيب كتكوت وللا ديك واسميه وردانى واقوله قدام الناس وردانى يا صاحبي انا عملت كذا وهبقي بطل كبير وانت صاحبي يا وردانى وانا ماليش غيرك

وردانى: شكرا يا زيزو (ينصرف زيزو)

بطرس: معقوله الغباء ده دا صدقكوا

اسحق: كتير كدا يابا هتعملهم ايه

خالد: الغريبه انك مهما تفهم بيقولك كلمة واحدة انت اللي هتغير الكون

سمير : انا كان نفسي اطلع جيل محامين فاهم لكن اشترطوا عليا انى اخد دكتوراه مع ان اللي ماسك المعهد انا اللي بكتبله المذكرات

هانى: نصيب يا متر

بطرس:فليغير الرب قلوب العباد

اسحق: طب يا متر لما اللي بيقتلوا الثوار بيطلعوا براءة ليه قابضين علي مرسي والشاطر وبديع مايوفروا فلوس المحاكمة وللا غلطات مرسي اللي قعد سنه اكتر من غلطات مبارك

سمير: يعنى علشان واحد قتل مراته وطلع براءة كل اللي يقتل مراته مانحاكمهوش(غاضبا) ونقفل المحاكم ومكاتبنا ونقلبهم قهاوي

خالد: يا متر هو مش قصده كده وضح له بالراحة اتعلم من بتاع العيش

وردان: علي فكرة يا اساتذه

سمير : ايه هتقول ايه تانى افتكرت رواية جديدة وحتحكيهالنا

وردانى: قضايا مرسي غير قضايا مبارك بس المصير واحد

اسحق: يعنى هيخرك

سمير: دا بعيد عن شنبكوا

وردانىى: لما الاخوان قتلوا السادات جابوا مين يترافع

سمير: الاستاذ رجائي عطية

وردانى: ولما عصمت اخو السادات اتحول للكسب غير المشروع مين اللي اترافع عنه

سمير : علي ما اذكر

وردانى: انت لسه هتفكر رجائي عطيه يبقي الديب اترافع عن مبارك وخد 5 مليون الاخوان هيجيبوه وهيدوله 50 مليون

اسحق: 50 مليون يااااااااه

وردانى: المحامين واكلينها والعة (ينظر لسمير ) بس فيه محامين محترمين

بطرس: (يتحسس كتفيه ) انا بردت يا اساتذة نستاذن احنا

الجميع: طب تصبح علي خير

اسحق: حتجيبوا الكوبايات

هانى: اه فكرتنى خد حساب الشاي احنا خدنا كام

اسحق: 9 شاي

هانى: يبقوا عشرة جنية

وردانى: خللي الحساب عندي يا دكتور

هانى: دا انت تستحق حاجة ساقعة ياواد ياوردانى

سمير : ليه يعنى

وردانى: ولا يهمك يا متر نجيبلك صاروخ

(يخرج الجميع)

(ستار)